Qeveria ka dërguar për shqyrtim në Kuvend projektligjin "Për sigurimin e detyrueshëm të banesave nga tërmetet dhe përmbytjet", i cili përfshin një ndryshim nga versioni i mëparshëm duke shtuar edhe rrezikun nga përmbytjet.
Ky projektligj synon krijimin e një mekanizmi financiar publik për përballimin e dëmeve në banesa nga tërmetet dhe përmbytjet. Në qendër të skemës qëndron Fondi Kombëtar për Sigurimin e Detyrueshëm nga Tërmetet dhe Përmbytjet, person juridik publik i organizuar në formë shoqërie aksionare.
Fondi do të grumbullojë primet e sigurimit të detyrueshëm të paguhura nga pronarët e banesave dhe do t'i përdorë për dëmshpërblimin e dëmeve materiale në banesa dhe sende brenda tyre. Kompanitë private të sigurimit do të veprojnë si agjentë për shpërndarjen e kontratave, mbledhjen e primeve dhe administrimin teknik, pa mbajtur riskun financiar.
Çmimi i primit do të miratohet nga Këshilli i Ministrave, mbi bazën e modeleve aktuariale të zhvilluara për kushtet e Shqipërisë, duke marrë parasysh riskun, zonën gjeografike dhe tipologjinë e ndërtesës. Shuma maksimale e sigurimit dhe metodologjia e llogaritjes së primit përcaktohen me vendim të Këshillit të Ministrave, me propozim të ministrit përgjegjës për Financat, pas mendimit të Autoritetit të Mbikëqyrjes Financiare.
Roli i Fondit dhe procedurat
- Fondi administron skemën kombëtare dhe siguron banesat si dhe ambientet brenda tyre të përdorura për shërbime, zyra apo qëllime të ngjashme.
- Në rast fatkeqësie, dëmet vlerësohen nga ekspertë të licencuar dhe pagesa kryhet nga Fondi brenda afateve të përcaktuara.
- Fondi krijon rezerva financiare përmes investimit të të ardhurave dhe nuk i nënshtrohet procedurave të falimentimit.
Përzgjedhja e agjentëve
Këshilli i Ministrave përcakton kriteret konkurruese për përzgjedhjen e agjentëve publikë dhe privatë, si dhe shoqërive të sigurimit për menaxhimin dhe shpërndarjen e skemës.
Përfshirja e përmbytjeve zgjeron rreziqet e mbuluara, por pritet të rrisë primet krahasuar me modelin e mëparshëm që përfshinte vetëm tërmetet.