Tregu i sigurimeve në Shqipëri shënoi rritje më të lartë gjatë vitit 2025, sipas të dhënave të Autoritetit të Mbikëqyrjes Financiare (AMF). Primet e shkruara bruto arritën vlerën e 27.1 miliardë lekëve, në rritje me 10.6% krahasuar me vitin 2024, kur rritja kishte qenë 7%. Ky tregues përfaqëson 1.03% të Prodhimit të Brendshëm Bruto, nga 0.97% një vit më parë. Primi i sigurimit për frymë u rrit me 11.8%, duke arritur 11463 lekë (rreth 119 euro), për herën e pestë radhazi.
Struktura e tregut
Sigurimet e jo-jetës dominuan me 24.7 miliardë lekë prime, ose 91% të totalit, në rritje me 9.9%. Pesha e këtij segmenti u ul lehtë për herën e shtatë radhazi, për shkak të rritjes më të shpejtë të sigurimeve të jetës, që zënë rreth 9%. Sigurimet detyrueshme përbëjnë 62.4% të primeve totale, ndërsa ato vullnetare 37.6%. Gjithsej u lidhën 1.68 milionë kontrata, me rritje 5.1% vjetore.
Sigurimet motorike
Sigurimet e detyrueshme motorike për përgjegjësi ndaj palëve të treta zënë 16.9 miliardë lekë, ose 68.6% të tregut. Sigurimi i brendshëm motorik TPL mbetet produkti më i madh, me 58% të primeve të jo-jetës dhe rritje 13.3%, falë sistemit të ri të llogaritjes së primeve mbi bazë rreziku, i futur në fuqi në 2025. Dëmet e paguara bruto arritën 8.6 miliardë lekë, me ulje 0.8%, ku motoriket zënë 6.5 miliardë lekë ose 76%.
Sigurimet vullnetare dhe të tjera
Sigurimet vullnetare shënuan 10.2 miliardë lekë, me rritje 7.9% dhe 10% në numër kontratash. Sigurimet e pronës dhe përgjegjësisë arritën 4.2 miliardë lekë, kryesisht nga zjarri dhe dëmtimet. Portofoli i zjarrit dhe forcave të natyrës u rrit me 10.25% në prime dhe 8.85% në kontrata. Sigurimet e aksidenteve dhe shëndetit shënuan 1.4 miliardë lekë, me rritje 3.7%.