Prokuroria Themelore e Pejës ka marrë vendimin për mbylljen e hetimeve ndaj Elbert Krasniqit, kryetar i Nismës së Re Demokratike të Kosovës (IRDK). Rasti ishte iniciuar pas kallëzimit penal të dorëzuar nga kryetari i Partisë Liberale Egjiptiane, Veton Berisha, i cili pretendonte se Krasniqi kishte ndikuar drejtpërdrejt në vullnetin e votuesve gjatë zgjedhjeve parlamentare të datës 6 qershor 2026.
Sipas vendimit të Prokurorisë, pas analizimit të shkresave të lëndës, nuk është gjetur asnjë dyshim i arsyeshëm se Elbert Krasniqi ka kryer veprën penale “Cenimi i përcaktimit të lirë të votuesve”, të parashikuar nga neni 210 i Kodit Penal të Republikës së Kosovës (KPRK). Institucioni i akuzës ka sqaruar se nuk janë gjetur prova materiale apo personale që të vërtetojnë se Krasniqi ka keqpërdorur varësinë ekonomike apo profesionale të votuesve, konkretisht shtetasve Benis Zeqiri dhe Rrahman Metaj, për t'i detyruar ata të votonin për partinë IRDK dhe kandidatin Avdyl Berisha.
Në lidhje me këtë vendim, vetë Elbert Krasniqi ka konfirmuar pranimin e njoftimit nga Prokuroria. Ai ka deklaruar se edhe gjatë ditës së zgjedhjeve, Policia e Kosovës kishte vlerësuar se nuk kishte elemente të ndonjë vepre penale. Prokuroria ka konstatuar gjithashtu se nuk ekziston bazë për ndjekjen e tij as për ndonjë vepër tjetër penale që ndiqet sipas detyrës zyrtare.