Prokuroria Themelore në Pejë ka marrë vendim për mbylljen e procedurës penale ndaj ministrit në detyrë, Elbert Krasniqi. Lajmin e ka konfirmuar avokati mbrojtës i ministrit, Artan Kastrati, duke theksuar se organi i akuzës nuk ka gjetur asnjë provë apo dyshim të bazuar që mbështet pretendimet për veprën penale të kanosjes.
Sipas avokatit Kastrati, ky vendim rikonfirmon pafajësinë e ministrit. Ai nënvizoi se denoncimi, i cili daton nga nëntori i vitit 2025, ishte i pabazuar dhe i motivuar politikisht. Kastrati sqaroi se, ditën kur pretendohet të ketë ndodhur ngjarja, Elbert Krasniqi ishte i shoqëruar nga familjarët e tij.
“Mirëpres vendimin e Prokurorisë Themelore në Pejë për mbyllje të rastit, pasi gjatë procedurës nuk është gjetur asnjë provë e vetme apo dyshim i bazuar që do të mbështeste pretendimet e ngritura ndaj ministrit Krasniqi kinse për kanosje ndaj personave të panjohur për ministrin e të njohur nga organet e drejtësisë”, deklaroi avokati Artan Kastrati.
Në qëndrimin e tij, mbrojtja vuri në dukje se vendimi i Prokurorisë dëshmon nevojën që drejtësia të mbështetet ekskluzivisht në fakte dhe prova, duke respektuar prezumimin e pafajësisë për çdo qytetar, pavarësisht nga pozita publike apo funksioni shtetëror. Avokati shtoi se akuzat e pambështetura krijojnë pasiguri juridike dhe nuk duhet të ndikojnë në ushtrimin e detyrave institucionale.