Prokuroria e Tiranës ka marrë në pyetje pesë fëmijë, të cilët pamjet e kamerave të sigurisë i tregojnë duke hedhur mbeturina në një karrocë, të konsideruar si vatër e zjarrit që përfshiu një pallat shumëkatësh pranë QSUT në Tiranë.
Të miturit, banorë të kompleksit, u pyetën në prani të psikologëve dhe prindërve. Sipas dëshmive të tyre, veprimet nuk ishin të qëllimshme. Ata shpjeguan se pranë një kondicioneri ndodhej karroca me mbeturina dhe një objekt i djegshëm, pa kuptuar rrezikun e mundshëm.
Prokurori i çështjes ka urdhëruar veprime të tjera hetimore në vendngjarje, si dhe pyetjen e personave të tjerë që mund të kenë dijeni për rrethanat. Ekspertiza shkencore për shkaqet e plota të zjarrit ende nuk ka përfunduar.
Nga referimi i Policisë, janë proceduar katër shtetas të dyshuar për shkelje të rregullave të mbrojtjes nga zjarri: Razie Sula, Agron Cara, Enver Ademi dhe Altin Furtuna. Gjykata Penale ka caktuar për ta masën e sigurisë detyrim paraqitje.
Videot e sekuestruara tregojnë se fasada e pallatit merr flakë brenda pesë sekondash, ndërsa zjarri dëmtoi 71 banesa. Hetimet vazhdojnë për zbardhjen e plotë të shkaqeve dhe përgjegjësive.
Përditësime
Ekspertiza konfirmoi se zjarri në karrocën me kartona pranë QSUT-së u shkaktua nga faktorë të jashtëm, duke përjashtuar shkëndijë elektrike ose bombol gazi.
Pesë fëmijët dëshmuan se panë një vazo që nxirrte tym pranë koshit. Zjarri u ndez pak sekonda pasi ata u larguan.
Në ngjarjen e 14 prillit, 8 persona u lënduan lehtë, përfshirë punonjës zjarrfikës.