Prokuroria Themelore në Prizren i ka paraqitur Gjykatës Themelore në Prizren kërkesën për caktimin e masës së paraburgimit ndaj të pandehurit Egzon Reshani. Ky i fundit është ndaluar të hënën nga policia kufitare në Muçivërcë, gjatë tentativës për të hyrë në territorin e Kosovës nga fshati Breznicë i Serbisë.
Sipas njoftimit zyrtar, Egzon Reshani ka qenë subjekt i dy urdhërarresteve aktive, si dhe ndaj tij ishin lëshuar letër-rreshtime vendore dhe ndërkombëtare, të nxjerra nga gjykata kompetente me kërkesë të organit të akuzës. Kërkesa për paraburgim është ngritur lidhur me dyshimet për kryerjen e veprave penale:
• "Detyrimi"
• "Privimi i kundërligjshëm i lirisë"
• "Frikësimi gjatë procedurës penale në vazhdimësi"
Përveç këtij rasti, ndaj të pandehurit janë duke u zhvilluar procedura të tjera penale në Departamentin për Krime të Rënda dhe Departamentin e Përgjithshëm të Prokurorisë Themelore në Prizren, si dhe në Prokurorinë Speciale të Republikës së Kosovës. Këto hetime ndërlidhen me dyshimet për veprat penale: "Vrasja e rëndë e mbetur në tentativë", "Mbajtja në pronësi, kontroll ose posedim të paautorizuar të armëve" dhe "Kanosja" drejtuar zyrtarëve shtetërorë.
Prokuroria ka vlerësuar se plotësohen kushtet ligjore për caktimin e paraburgimit, duke argumentuar se i pandehuri ka qëndruar për një kohë të gjatë i pakapshëm për organet e drejtësisë. Gjithashtu, organi i akuzës ka theksuar se ekziston rreziku i ikjes dhe i pengimit të zhvillimit të rregullt të procedurës penale. Personat e përmendur në këtë çështje prezumohen të pafajshëm deri në një vendim të formës së prerë nga gjykata kompetente.