Prokuroria spanjolle ka kërkuar një dënim prej 22 vitesh burg për shtetasin italian Marco Romeo, i akuzuar për vrasjen e partneres së tij shqiptare Sibora Gagani në Torremolinos të Spanjës gjatë verës së 2014-ës dhe fshehjen e trupit të saj për gati nëntë vjet.
Sipas aktakuzës, Marco Romeo dhe Sibora Gagani u njohën në 2009 në Itali dhe në 2010 u zhvendosën për të jetuar së bashku në Torremolinos. Pas një ndarjeje të përkohshme, në korrik të 2014-ës ata u kthyen të banojnë në një apartament në zonën El Calvario.
Prokuroria pretendon se midis 7 dhe 14 korrikut të atij viti, i akuzuari sulmoi 22-vjeçaren në banesë me një armë të mprehtë. Ai i shkaktoi të paktën katër plagë, tre prej tyre në shpinë, që i morën jetën.
Pas krimit, Marco Romeo fshehu trupin brenda banesës duke ndërtuar një strukturë në mansardë me dru, qese plastike, rërë dhe një substancë bazike, ndoshta gëlqere, për të mbyllur hapësirën dhe parandaluar përhapjen e erërave. Ai mbajti mashtrimin duke raportuar zhdukjen e saj në shtator të 2014-ës dhe duke dërguar mesazhe te nëna e viktimës.
Rasti u rihap në maj të 2023-ës, kur Marco Romeo u arrestua për vrasjen e një partnereje tjetër. Para agjentëve ai përmendi Sibora Gaganin dhe tregoi vendin e fshehur. Më 6 qershor 2023 policia gjeti trupin e pajetë të mbështjellë në qese plastike.
Prokuroria e kualifikon ngjarjen si vrasje me paramendim, e rënduar nga marrëdhënia mes çiftit, dhe një krim kundër integritetit moral për fshehjen e trupit. Kërkon 20 vjet për vrasjen dhe 2 vjet për krimin kundër integritetit moral.
Përditësime
Prokuroria spanjolle kërkon dëmshpërblim prej 198 mijë eurosh për nënën e viktimës Sibora Gaganit.