Autoritetet italiane arrestuan një 36-vjeçar shqiptar për dyshime për zjarrvënie në apartamentin e ish-partneres së tij. Ngjarja ndodhi disa ditë më parë në Corso Ho Chi Min, Comiso pranë Raguzës, pas një grindjeje mes tyre.
Karabinierët e stacionit Comiso konfirmojnë se i dyshuari përdori lëndë djegëse për të ndezur flakët brenda banesës. Zjarri dëmtoi të gjithë apartamentin, por nuk kaloi në strukturat ngjitur.
Të dy individët, autori dhe ish-partnerja, pësuan lëndime nga djegiet në trup dhe helmimi me monoksid karboni. Ata u shtruan në Spitalin Guzzardi, ku morën kujdes mjekësor dhe ndodhen jashtë rrezikut për jetën.
Pas daljes nga spitali, 36-vjeçari u dërgua në burgun e Raguzës, ku mbahet nën mbikëqyrje gjyqësore. Dyshohet se motivi lidhet me konfliktet e vazhdueshme dhe refuzimin e tij për të pranuar ndarjen.