Prokuroria Speciale e Republikës së Kosovës ka ngritur aktakuzë ndaj N.C., gardiane në Burgun e Prishtinës, paralelja për gra në Lipjan, për veprën penale "Krime lufte kundër popullsisë civile".
Sipas njoftimit të prokurorisë, ekziston dyshim i bazuar se N.C., gjatë periudhës 1998-1999, në cilësinë e gardianes zyrtare, në bashkëkryerje me zyrtarë të tjerë të burgut, ka shkelur rregullat e së drejtës ndërkombëtare gjatë konfliktit të armatosur.
Aktakuza e akuzon se ajo ka keqtrajtuar në mënyrë sistematike të burgosurat shqiptare, duke i kanosur për jetë dhe duke i torturuar në mënyrë çnjerëzore me mjete të ndryshme, si shkop gome, shqelma dhe grushte, deri në alivanosje, duke shkaktuar lëndime trupore.
Si pasojë, viktimat kanë pësuar dhunë psikike, gjendje ankthi dhe frike, si dhe cenim të rëndë të dinjitetit njerëzor.
Rasti i ka kaluar për shqyrtim Departamentit Special të Gjykatës Themelore në Prishtinë.
Kohëve të fundit, prokuroria ka ngritur aktakuzë në mungesë ndaj 21 personave për vrasjen e civilëve në Reçak të Shtimit në dhjetor të vitit të kaluar, si dhe ndaj 21 personave të tjerë për dëbimin me forcë të mbi 800.000 civilëve shqiptarë nga Kosova gjatë luftës.
Gjatë luftës në Kosovë u vranë mbi 13.000 civilë, mijëra u zhdukën dhe më shumë se 1.500 vazhdojnë të jenë të pagjetur, kryesisht shqiptarë. Qindra trupa janë gjetur në varreza masive në Serbi, ndërsa udhëheqës serbë si Sllobodan Millosheviq janë gjykuar nga Gjykata Ndërkombëtare e Hagës.