Prokuroria Themelore në Prishtinë ka njoftuar se rreth orës 16:00 ka pranuar informacion për sulm fizik ndaj gazetarit Burim Pacolli.
Menjëherë pas kësaj, prokurori kujdestar ka ndërmarrë veprimet procedurale dhe ka autorizuar Policinë e Kosovës për zhvillimin e hetimeve intensive. Qëllimi është identifikimi dhe lokalizimi i personave të dyshuar, si dhe sigurimi i provave relevante.
Organet e rendit po punojnë në koordinim të plotë me Prokurorin e Shtetit. Për shkak të fazës së hershme të hetimit dhe për ruajtjen e integritetit të procesit, nuk jepen detaje shtesë.
Sipas një burimi, mes dyshuarve përmendet reperi Mossi dhe disa të tjerë, por kjo nuk konfirmohet nga organet zyrtare.
Prokuroria thekson përkushtimin për trajtimin me prioritet të rastit, duke garantuar një hetim të shpejtë, të paanshëm dhe profesional, në përputhje me legjislacionin. Opinioni publik do të njoftohet për çdo zhvillim të ri.