Prokuroria Themelore në Prishtinë ka njoftuar se ka nisur intervistimin e anëtarëve të Qendrës së Numërimit dhe Rezultateve (QNR), konkretisht të Qendrës Komunale në Drenas. Këto veprime zhvillohen në bashkëpunim me Policinë e Kosovës dhe në kuadër të hetimeve për dyshime keqpërdorimesh gjatë procesit të numërimit të votave të kandidatëve të subjekteve politike.
Intervistimet kryhen nga Departamenti për Krime të Rënda i Prokurorisë, në bashkëpunim me Drejtoria për Hetimin e Krimeve Ekonomike dhe Korrupsionit në Prishtinë, pas autorizimit prokurorial. Prokuroria Themelore në Prishtinë, në koordinim me Policinë e Kosovës, do të ndërmarrë të gjitha veprimet e nevojshme ligjore dhe hetimore për zbardhjen e plotë të rrethanave të rastit.
Opinionit publik do t’i bëhet i ditur çdo zhvillim i mëtejshëm në këtë proces.
Përditësime
Prokuroria Themelore në Prizren ka nisur hetimet për manipulim votash në Qendrën Komunale të Numërimit në Dragash, pas Drenasit. Hetimet u nisën me vetë-iniciativë dhe autorizim të kryeprokurorit Petrit Kryeziu, pas informacioneve publike për rinumërim. Dyshimet lidhen me veprat penale në Kapitelin XVIII të KPRK-së (shkelja e të drejtave të votimit). Prokuroria do të lëshojë komunikatë shtesë pas intervistimit të të dyshuarve.
Prokuroria Themelore në Prizren po zhvillon hetime në Komunën e Dragashit, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsion në Prizren.
Autoritetet paralajmërojnë një komunikatë shtesë gjatë ditës, pas intervistimit të të dyshuarve në polici.
Prokuroria Themelore në Prizren ka intervistuar 51 të dyshuar për manipulim votash në Dragash.
9 prej tyre, kryesues të komisioneve, u mbajtën në ndalim për 48 orë për falsifikim të rezultateve të votimit.
Prokuroria do të vlerësojë kërkesën për masën e sigurimit të prezencës së të pandehurve.