Prokuroria Themelore në Prizren, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsion, ka nisur hetime me vetiniciativë për falsifikim të rezultateve zgjedhore në Dragash.
Hetimet u autorizuan nga kryeprokurori Petrit Kryeziu pas pranimit të informacioneve publike lidhur me procesin e rinumërimit të votave në Qendrën Komunale të Numërimit në Dragash. Në kuadër të tyre, organet hetimore intervistuan 51 persona të dyshuar.
Nga këta, 9 komisionerë u ndaluan për 48 orë me urdhër të Prokurorit të Shtetit. Ata dyshohen se kanë kryer veprën penale "Falsifikimi i rezultateve të votimit", sipas nenit 216, paragrafi 2 të Kodit Penal të Republikës së Kosovës.
Prokuroria njofton se brenda afateve ligjore do të vlerësojë kërkesën për caktimin e masave që sigurojnë praninë e të pandehurve në procedurë.
Institucionet theksojnë përkushtimin për mbrojtjen e integritetit të procesit zgjedhor, garantimin e të drejtës së votës dhe luftën kundër veprave penale që cenojnë zgjedhjet e lira e demokratike.
Përditësime
Prokuroria paralajmëron publikimin e një komunikate shtesë gjatë ditës, me detaje mbi veprimet hetimore pas intervistimit të të dyshuarve dhe bashkëpunimin me Drejtorinë për Hetimin e Krimeve Ekonomike dhe Korrupsion në Prizren.
Prokuroria zhvendos hetimin për falsifikim votash nga Dragash në Suharekë.
- Ka ndaluar 19 kryesues komisionesh për 48 orë.
- Ka intervistuar 72 persona.
- Bashkëpunon me Drejtorinë Rajonale të Policisë në Prizren.