Protesta qytetare që kërkon dorëheqjen e qeverisë ka arritur në ditën e saj të 59-të. Pjesëmarrësit janë mbledhur sërish para ndërtesës së Kryeministrisë, ndërsa në fjalën e saj, aktivistja Sidorela Vatnikaj ka adresuar zhvillimet e fundit të ndodhura në protestën e zhvilluar para Parlamentit.
Kritikat mbi sjelljen e Policisë së Shtetit
Sidorela Vatnikaj ka hedhur akuza të forta ndaj forcave të rendit, duke i cilësuar veprimet e tyre si joproporcionale ndaj protestuesve. Sipas saj, prania e dhjetëra efektivëve me shkopinj gome dhe autobotë nuk ka qenë e justifikuar përballë numrit dhe sjelljes së qytetarëve. Ajo bëri me dije se gjatë këtij tubimi janë shoqëruar 6 qytetarë, ndërsa disa të tjerë janë goditur me spraj me piper. Ajo theksoi se mbledhja para Parlamentit ka qenë një akt simbolik kundërshtimi ndaj një institucioni që nuk përfaqëson interesat e qytetarëve. Përtej shoqërimeve, ajo denoncoi praninë e civilëve të paverifikuar dhe kërkoi hetim të menjëhershëm për një rast kërcënimi me thikë ndaj protestuesve, duke e cilësuar atë si ngjarjen më të rëndë të ndodhur në këtë protestë.
Thirrjet për dorëheqje dhe ndërgjegjësim
Gjatë tubimit, nënë Liza, banore e zonës së 5 Majit, u shpreh duke kërkuar dorëheqjen e kryeministrit Edi Rama dhe kabinetit qeveritar. Ajo bëri thirrje gjithashtu ndaj forcave të policisë që të mos qëndrojnë përballë popullit, por t'i bashkohen kauzës qytetare. Në fjalën e saj, ajo përmendi vështirësitë ekonomike, duke iu referuar të ardhurave mujore prej 150 mijë lekësh, të cilat sipas saj, janë të pamjaftueshme për të përballuar kostot e jetesës dhe faturat e shërbimeve bazë.