Jasir Asani dhe Regi Lushkja, futbollistë shqiptarë te Esteghlal dhe Traktor FC, nuk kanë dhënë shenja prej një jave për shkak të ndërprerjes së internetit dhe sinjaleve celulare. Kjo situatë lidhet me protestat popullore dhe shtypjen e tyre në Iran, që kanë paralizuar komunikimin.
Protestat kanë çuar në ndalimin e sinjalit të internetit me urdhër të shtetit iranian që nga fillimi i tyre. Gjithashtu, sinjalet e kompanive të telefonisë celulare janë ndërprerë, duke bërë të pamundur lidhjen me botën e jashtme. Të dy futbollistët dhe klubet e tyre kanë ndërprerë aktivitetin në rrjetet sociale.
Nuk ka informacion të ri për Asanin apo Lushkjen. Klubet Esteghlal dhe Traktor FC nuk kanë publikuar asgjë në internet prej më shumë se një jave.
Trajneri i Esteghlal-it, portugezi Rikardo Sa Pinto, është strehuar prej dy ditësh në ambasadën e Portugalisë në Teheran, bashkë me stafin teknik. Ai ka postuar video në rrjete sociale, duke thënë: "Unë jam detyruar të vij këtu pasi nuk kam pasur internet prej shumë kohësh dhe nuk kisha as sinjal në celular. Po presim me ankth të mësojmë se çfarë po ndodh apo çfarë mund të ndodhë, por për momentin jemi shëndosh e mirë".
Situata ka shtyrë disa të huaj drejt strehimit në ambasada dhe konsullata. Nuk jepen informacione mbi shtetasit e huaj në Iran.