Të hënën, më 16 shkurt 2026, në Vlorë u mbajt një protestë e shoqatës së shërbimit të transportit urban ndërqytetas dhe ndërkombëtar kundër zhvendosjes së stacionit interurban.
Rreth 100 përfaqësues të këtij shërbimi u mblodhën para Bashkisë Vlorë për të kërkuar rishikimin e vendimit të marrë nga Këshilli Bashkiak. Ky vendim, i hyrë tashmë në fuqi, parashikon zhvendosjen e stacionit nga rruga e re në hyrje të qytetit në aksin nga IEVP Vlorë (paraburgimi) drejt ish-shkollës së Aviacionit.
Protestuesit, përfshirë drejtuesit e mjeteve dhe përfaqësuesit e kompanive të transportit, argumentojnë se destinacioni i ri nuk plotëson kushtet bazë:
• Mungojnë ambientet e shërbimit dhe strehat e pritjes për pasagjerët;
• Nuk ka tualete publike;
• Hapësira e trotuarit është e ngushtë për qëndrimin e pasagjerëve;
• Mungon sinjalistika dhe ekziston rreziku për aksidente;
• Distanca është e largët nga qyteti.
Ky është reagimi i disatë i shoqatës, e cila paralajmëron se, në mungesë të reagimit nga Bashkia, protesta do të përshkallëzohet.