Tregtarët e tregut industrial në Vlorë kanë zhvilluar mbrëmjen e së hënës një protestë para Bashkisë së Vlorës.
Shkak për protestën është bërë njoftimi i Bashkisë, sipas të cilit tregtarët duhet të largohen brenda tre ditësh nga zona ku ushtrojnë aktivitetin e tyre tregtar, në kuadër të një projekti për krijimin e një tregu të ri. Tregtarët shprehen se nuk kanë alternativë për zhvendosje dhe se njoftimi u bë pa konsultë paraprake me ta.
Sipas tyre, largimi rrezikon ekonominë e dhjetëra familjeve që varen nga ky aktivitet tregtar, duke përfshirë mallin e stokuar dhe vijimin e punës. Ata theksojnë se afati i shkurtër dhe vendimmarrja njëanshme kërcënojnë jetesën e tyre.
Pas protestës, tregtarët u takuan për rreth një orë me kryebashkiaken Brunilda Mersini. Nga takimi nuk doli dakordësi, pasi alternativat e propozuara nga Bashkia nuk u konsideruan të përshtatshme. Zonat e kërkuara nga tregtarët nuk janë pronë e Bashkisë, ndërsa kryebashkiakja ka thënë se nuk kemi prona të tjera.
Përditësime
Tregtarët e Vlorës arritën dakordësi me Bashkinë e Vlorës. Ata qëndrojnë në tregun industrial deri në gjetjen e hapësirës së re, ndërsa puna për tregun e ri nis paralelisht.
Tregtarët hynë me forcë në ambientet e brendshme të Bashkisë dhe debatuan me nënkryetaren Irena Toshkallari.
Protesta vazhdon ditën e dytë.
Tregtarët posedojnë kontrata si të vetëpunësuar nga Bashkia për aktivitet 30-vjeçar.
"Kemi kontratë zyrtare dhe vuajmë vështirësi të mëdha pas 30 vitesh punë", deklaroi tregtari Xhemal Meta.
"Nëse nuk respektohet marrëveshja, protestat do të vazhdojnë", paralajmëroi tregtari Fatmir Hoxha.