Lëvizja Revolta ka paralajmëruar organizimin e një proteste qytetare sot, më 6 gusht 2026, duke filluar nga ora 10:00. Tubimi do të zhvillohet në sheshin Ibrahim Rugova në Prishtinë, përballë objektit të Kuvendit të Kosovës. Sipas njoftimit zyrtar të organizatorëve, qëllimi i këtij tubimi është mbrojtja e sovranitetit dhe integritetit shtetëror të Republikës së Kosovës.
Në thirrjen e bërë për qytetarët, lëvizja thekson se kjo protestë nuk ka karakter partiak, por përqendrohet në çështje që lidhen me shtetësinë dhe të ardhmen e vendit. Organizatorët kanë bërë publike tri kërkesat kryesore, të cilat synojnë t'i adresojnë përmes kësaj proteste:
• Publikimi i të dhënave të sakta për numrin e aplikimeve dhe shtetësive të fituara nga shtetasit e Serbisë në bazë të ligjit në fuqi.
• Shfuqizimi i Ligjit nr. 10/L-023 për Shtetësinë e Republikës së Kosovës.
• Shfuqizimi i nenit 155 të Kushtetutës së Republikës së Kosovës.
Lëvizja u ka bërë thirrje qytetarëve që të bashkohen në këtë protestë, duke e cilësuar atë si një detyrim për mbrojtjen e interesave shtetërore.