Pas përfundimit të fjalimeve në podiumin para godinës së Kryeministrisë, mijëra protestues janë organizuar në një marshim përgjatë akseve kryesore të kryeqytetit. Lëvizja e turmës ka shkaktuar ngadalësim të përkohshëm të qarkullimit të automjeteve në zonat ku kaluan protestuesit.
Gjatë marshimit, pjesëmarrësit kanë mbajtur ndezur dritat e telefonave celularë dhe kanë ndjekur ritmin e këngës "Dua më shumë Shqipërinë". Ky tubim shënon ditën e 7-të të protestave, të cilat po ndjekin një model të ngjashëm me ditët e mëparshme, duke u shndërruar nga grumbullime statike në lëvizje dinamike nëpër qytet.
Sipas pjesëmarrësve, qëllimi i këtyre thirrjeve mbetet dorëheqja e kryeministrit Edi Rama. Organizatorët e tubimit u kanë bërë thirrje qytetarëve për një pjesëmarrje më të gjerë, duke paralajmëruar përshkallëzim të mëtejshëm të revoltës qytetare në ditët në vijim.