Sot, në orën 09:00, një grup qytetarësh dhe aktivistësh kanë nisur një marshim solidarizimi përpara Gjykatës së Tiranës, në momentin kur pritet të jepen masat e sigurisë për protestuesit e arrestuar. Tubimi zhvillohet pranë strukturës së SPAK-ut, si vazhdimësi e reagimeve të nisura pas përplasjeve të së enjtes.
Ngjarjet pasuan protestën e organizuar më 2 korrik gjatë seancës plenare në Kuvend, ku situata u përshkallëzua me hedhje gurësh, vezësh dhe sendesh të forta nga protestuesit. Forcat e policisë ndërhynë me gaz lotsjellës dhe ujë me presion për të shpërndarë turmën, pasi protestuesit kishin bllokuar daljet e Parlamentit. Si pasojë e përplasjeve fizike, autoritetet njoftuan se janë lënduar efektivë të policisë dhe qytetarë, ndërsa janë shoqëruar 18 persona, nga të cilët 9 janë vënë në pranga.
Një natë para seancës gjyqësore, qytetarët marshuan deri pas mesnate përpara Komisariatit Nr. 3 në rrugën “Mine Peza”, me thirrjet "Lironi çunat". Organizatorët e tubimit e kanë cilësuar ndalimin e të arrestuarve si të paligjshëm dhe me motive politike, duke paralajmëruar se qëndresa do të vazhdojë deri në lirimin e tyre.