Në kuadër të Reformës Administrativo-Territoriale 2.0, Komisioni i Posaçëm Parlamentar ka hartuar një raport i cili është depozituar në Kuvend. Sipas të dhënave zyrtare të pasqyruara në këtë dokument, popullsia e Shqipërisë rezulton me 2.402.113 banorë, nga të cilët 2.186.917 janë deklaruar me përkatësi etnike shqiptare. Mbi 65 mijë qytetarë janë identifikuar si pjesë e pakicave kombëtare, ku komuniteti më i madh është ai grek me 23.485 banorë.
Sipas raportit, shpërndarja e komuniteteve të tjera paraqitet si më poshtë:
• Komuniteti egjiptian: 12.375 banorë
• Komuniteti rom: 9.813 banorë
• Komuniteti bullgar: 7.057 banorë
• Komuniteti boshnjak: 2.963 banorë
• Komuniteti arumun: 2.459 banorë
• Komuniteti maqedonas: 2.281 banorë
• Komuniteti serb: 584 banorë
• Komuniteti malazez: 511 banorë
Dokumenti evidenton se 134.451 persona nuk kanë të dhëna të disponueshme për përkatësinë etnike, ndërsa 13.507 të tjerë nuk kanë pranuar të përgjigjen. Deputetët socialistë nënvizojnë se reforma nuk duhet të jetë një proces që udhëhiqet vetëm nga treguesit ekonomikë, financiarë apo demografikë. Ata kërkojnë që të garantohet mbrojtja e identitetit kulturor dhe e të drejtave të pakicave, duke mbajtur parasysh se kufijtë administrativë ndikojnë në aksesin në shërbime dhe përdorimin e gjuhës.
Në raport veçohen bashkitë Dropull (në qarkun e Gjirokastrës), Finiq (në qarkun e Vlorës) dhe Pustec (në qarkun e Korçës) si njësi që kërkojnë trajtim të veçantë. Po ashtu, dokumenti përmend zona të tjera me identitet historik dhe kulturor, si Hasi dhe Konispoli. Raporti rikujton legjislacionin aktual, i cili parashikon se në njësitë vendore ku pakicat kombëtare përbëjnë mbi 20% të popullsisë, komunitetet kanë të drejtën e përdorimit të gjuhës së tyre në institucione dhe të vendosjes së emërtimeve dygjuhëshe.