Prokuroria Speciale e Republikës së Kosovës ka ngritur aktakuzë ndaj të pandehurit D.Z. për dy vepra penale: nxitja e përçarjes dhe mosdurimit si dhe mbajtja në pronësi, kontroll ose posedim i paautorizuar i armëve.
Sipas aktakuzës, më 5 mars 2026, rreth orës 02:00, në sheshin Adem Jashari në Mitrovicë, i pandehuri dyshohet se ka dëmtuar flamurin kombëtar të Republikës së Turqisë me një mjet të mprehtë. Kjo ndodhi gjatë një aktiviteti publik të organizuar për iftar në muajin e Ramazanit. Ai dyshohet se ka shprehur edhe fyerje publike ndaj këtij simboli, me qëllim nxitjen e urrejtjes dhe mosdurimit, duke cenuar rendin publik.
Në pikën e dytë të aktakuzës specifikohet se, nga një periudhë e pacaktuar deri më 12 mars 2026, i pandehuri ka poseduar një armë dhe municion në kundërshtim me ligjin në fuqi dhe pa autorizim të nevojshëm.
Prokuroria Speciale ka theksuar përkushtimin e saj për ndjekjen e rasteve të tilla në funksion të ruajtjes së rendit kushtetues dhe vlerave demokratike në vend.