Hetimet për zhdukjen e shumës prej 69 milionë lekësh nga filiali i Postës Shqiptare në Durrës janë thelluar pas publikimit të pamjeve të reja nga kamerat e sigurisë. Materiali filmik, tashmë pjesë e dosjes hetimore, shfaq ish-shefen e Financës, V. Duni, duke lëvizur në ambientet e brendshme të institucionit me një thes në dorë.
Në pamjet e siguruara nga korrespondentja e Top Channel, Vali Qyrfyçi, duket momenti kur V. Duni tenton të ndryshojë drejtimin e lëvizjes pasi vëren prezencën e ish-drejtoreshës së filialit, Elisabeta Mataj. Pavarësisht tentativës për shmangie, ish-shefja e Financës ndalon pas thirrjes së drejtoreshës.
Pamjet ndërpriten menjëherë pas këtij shkëmbimi. Këto dëshmi vizuale po analizohen nga grupi hetimor për të zbardhur rrethanat e zhdukjes së fondit nga arkat e institucionit.