Tri organizata sindikale të Radiotelevizionit të Kosovës (RTK) – Sindikata e Pavarur e RTK-së, Sindikata e Punëtorëve të RTK-së dhe Shoqata Sindikale e Radio Kosovës – kanë njoftuar mbajtjen e një proteste sot, më 9 qershor 2026, në orën 12:00, para objektit të Televizionit të Kosovës.
Protesta organizohet si reagim ndaj mosalokimit të plotë të pagave, situatë e cila ka shkaktuar vështirësi financiare për qindra punonjës dhe familjet e tyre. Sindikatat kërkojnë ekzekutimin e menjëhershëm të pjesës së mbetur të pagave, duke theksuar se deri më tani nuk është ofruar asnjë zgjidhje konkrete nga organet drejtuese të institucionit.
Sipas sindikatave, punonjësit nuk duhet të mbajnë përgjegjësi për sfidat financiare apo organizative të institucionit, ndërsa marrja e pagës së plotë është një e drejtë themelore e tyre. Përmes kësaj proteste, sindikatat u kanë bërë thirrje të gjithë punonjësve që të bashkohen në mbrojtje të dinjitetit profesional dhe sigurisë së tyre ekonomike.