Recep Tayyip Erdoğan, Presidenti i Turqisë, ka uruar futbollistët e kombëtares së vendit të tij për kualifikimin në finalen e play-off-it të eliminatoreve evropiane për Kupën e Botës FIFA 2026. Ndeshja vendimtare kundër Kosovës zhvillohet më 31 mars në Prishtinë.
Gjatë një bisede telefonike, ai foli me Ministrin e Sportit Osman Aşkın Bak, Presidentin e Federatës Turke të Futbollit İbrahim Ethem Hacıosmanoğlu, trajnerin e kombëtares Vincenzo Montella, si dhe me futbollistët. Erdoğan u dëshiroi suksese në përballjen me Kosovën, vendin mik e vlla, siç e ka quajtur në të kaluarën.
Ende nuk ka vendim përfundimtar nëse Presidenti turk do të jetë i pranishëm personalisht në stadium. Burime të KosovaPress brenda kabinetit të tij bëjnë të ditur se për ditën e martë, 31 mars, ai ka agjendë të paracaktuar. Një vendim eventual për ndryshimin e saj mund të merret vetëm pas të dielës.
Erdoğan ka vizituar Kosovën dy herë, në 2010 dhe 2013, i shoqëruar nga atëbotë kryeministri Hashim Thaçi. Në vizitën e parë, ata vizituan disa xhami, ndërsa në të dytën morën pjesë në inaugurimin e zgjerimit të Aeroportit Ndërkombëtar Adem Jashari. Atje, ai deklaroi: "Kosova është Turqi, Turqia është Kosovë", si shprehje e miqësisë midis dy vendeve.