Qeveria e Kosovës do të mbajë mbledhjen e saj të shtatë më 30 mars, e hënë, në orën 09:00.
Në rend dite janë një sërë vendimesh, midis të cilave propozimi për ndarjen e shpërblimit për futbollistët e Përfaqësueses së Kosovës dhe miratimi i pagesës së pagës së 13-të për punonjësit e financuar nga buxheti i shtetit.
Një pikë kryesore është propozimi i Ministrisë së Mbrojtjes për t’i kërkuar Kuvendit dërgimin e Forcës së Sigurisë së Kosovës (FSK) si pjesë e Forcës Ndërkombëtare Stabilizuese në Gaza.
Projektligjet në shqyrtim
Në pjesën legjislative, qeveria do të trajtojë:
- Byronë Shtetërore për Verifikimin dhe Konfiskimin e Pasurisë së Pajustifikueshme;
- Inspektoratin Qendror për Mjedisin dhe Ndërtimin;
- financimin e menaxhimit të resurseve ujore;
- banimin social e të përballueshëm.
Po ashtu do të shqyrtohet raporti i vlerësimit të sistemit të financimit të komunave për vitin 2025, raporti vjetor financiar për Buxhetin e Republikës së Kosovës për 2025, si dhe vendime për shpronësime, emërime dhe rialokime buxhetore në disa ministri.
Përditësime
Qeveria e Kosovës miratoi një shpërblim prej 500 mijë eurosh për Përfaqësuesen Kombëtare të Kosovës në futboll.
- Ekipi fitoi 4:3 kundër Sllovakisë të enjten në gjysmëfinalen e plej-ofit për Botërorin 2026.