Qeveria e Kosovës miratoi projektligjet për ratifikimin e tre protokolleve shtesë të Marrëveshjes së Tregtisë së Lirë të Evropës Qendrore (CEFTA). Këto përfshijnë Protokollin Shtesë 6 për tregtinë në shërbime, Protokollin Shtesë 5 për aderimin dhe amendamentimin e marrëveshjes, si dhe Protokollin Shtesë 7 për zgjidhjen e mosmarrëveshjeve.
Ministrja e Industrisë, Ndërmarrësisë dhe Tregtisë, Mimoza Kusari-Lila, theksoi se miratimi përbën një arritje të rëndësishme për vendin. Ajo nënvizoi se për herë të parë protokollet do të ratifikohen në Kuvendin e Kosovës pa përfshirjen e UNMIK-ut.
"Kjo është një arritje shumë e madhe e Republikës së Kosovës, është hera e parë që protokollet e CEFTA-s do të miratohen në Kuvendin e Republikës së Kosovës, si Republikë e Kosovës, pa UNMIK-un. Kjo është bërë falë një pune intensive edhe të qeverisë Kurti 2, edhe të paraardhëses sime zonjës Rozeta Hajdari, dhe gjithashtu tashmë kemi arritur në fazën ku protokollet 5, 6 dhe 7, si protokolle shtesë për të gjitha vendet anëtare të CEFTA-s, kanë trajtimin e barabartë në të gjitha vendet anëtare të CEFTA-s. Ministria në fushën e bashkimit ndërkombëtar, në fushën e tregtisë, ka zhvilluar nismat për negocimin e këtyre tre protokolleve", deklaroi Kusari-Lila.
Protokollet do të kalojnë tani për shqyrtim në Kuvend për ratifikim përfundimtar.