Kuvendi i Kosovës miratoi sot marrëveshjen për tregti të lirë ndërmjet Kosovës dhe shteteve të EFTA-s, me 89 vota për, asnjë kundër dhe asnjë abstenim.
Ministrja e Industrisë, Tregtisë dhe Ndërmarrësisë, Mimoza Kusari-Lila, prezantoi marrëveshjen si një instrument të rëndësishëm të politikës tregtare të Kosovës. Ajo theksoi se kjo do të kontribuojë në thellimin e integrimit ekonomik me tregjet evropiane që kanë fuqi të lartë blerëse dhe standarde të avancuara rregullative.
Marrëveshja derivon nga deklarata e përbashkët e nënshkruar në fund të vitit 2018 në Gjenevë, e cila hapi rrugën për nënshkrimin e saj më 22 janar 2024 në Konferencën Ndërkombëtare të Davosit në Zvicër.
Sipas ministres Kusari-Lila, marrëveshja përfshin liberalizimin progresiv të tregtisë së mallrave përmes eliminimit të tarifave doganore për shumicën e produkteve industriale, përmirësimin e qasjes në treg për produkte bujqësore të caktuara, të drejtat e pronësisë intelektuale, rregullat për origjinën e mallrave dhe rritjen e sigurisë juridike për operatorët ekonomikë.
Një komponent tjetër i rëndësishëm është tregtia në shërbime, ku parashihen shërbimet profesionale, financiare, transporti, teknologjisë së informacionit dhe ato turistike.
Në të njëjtën seancë, Kuvendi miratoi edhe protokollet 5, 6 dhe 7 të aderimit dhe amendamentimit të marrëveshjes për tregti të lirë të Evropës Qendrore, duke bërë kështu katër marrëveshje ndërkombëtare në total.