Komisioni për Ekonomi, Industri, Ndërmarrësi, Tregti dhe Inovacion në Kuvendin e Kosovës miratoi me 7 vota për dhe 1 abstenim projektligjin për ratifikimin e marrëveshjes për tregti të lirë midis Republikës së Kosovës dhe shteteve anëtare të EFTA-s: Zvicrës, Norvegjisë, Islandës dhe Lihtenshtajnit. Ngjarja ndodhi në mbledhjen e 22-23 prillit 2026.
Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, prezantoi projektligjin në komision. Ajo theksoi se marrëveshja përbën një instrument të rëndësishëm të politikës tregtare të Kosovës dhe kontribuon në integrimin ekonomik në tregjet evropiane me fuqi blerëse të lartë dhe standarde rregullative të avancuara.
Marrëveshja derivon nga deklarata e përbashkët për bashkëpunim e nënshkruar në fund të vitit 2018 në Gjenevë, ku në nenin e katërt parashihej nënshkimi i saj. Palët janë pajtuar për:
- liberalizimin progresiv të tregtisë së mallrave përmes eliminimit të tarifave doganore për shumicën e produkteve industriale;
- përmirësimin e qasjes në treg për produkte bujqësore të caktuara;
- të drejtat e pronësisë intelektuale;
- rregulla më të qarta për tregtinë e mallrave dhe shërbimeve, përfshirë sektorët e financave, teknologjisë së informacionit dhe turizmit.
Tregtia me vendet e EFTA-s ka shënuar rritje të qëndrueshme. Eksportet e Kosovës u rritën nga 77.5 milionë euro në vitin 2023 në mbi 100 milionë euro në vitin 2025, duke përbërë rreth 10% të eksporteve totale. Ratifikimi pritet të forcojë më tej eksportet dhe investimet.