Nga sot, 19 mars 2026, hyn në fuqi ulja e akcizës së karburantit për 20 ditë, e miratuar mbrëmë nga Këshilli i Ministrave i Italisë. Dekreti u publikua në Fletoren Zyrtare më 18 mars 2026 dhe parashikon ulje prej 25 cent për litër në çmimin e karburanteve në pompa.
Kryeministrja Giorgia Meloni e cilësoi këtë masë kundër spekulimit dhe për të përmbajtur kostot shumë të larta të furnizimit me karburant. Ajo mblodhi papritur Këshillin e Ministrave në orën 19:00, edhe pse ishte në prag të nisjes për në Bruksel, për të miratuar vendimin. Mbledhja zgjati vetëm gjysmë ore.
Gjatë ditës, ministritë e Ekonomisë dhe Energjisë punuan për të finalizuar paketën, të cilën Meloni donte ta miratonte para se të përballej në nivel europian me çështjen e taksave ETS që rëndojnë industrinë. Qeveria vuri në dispozicion pak më shumë se gjysmë miliard euro për të ndaluar rritjet e pajustifikuara dhe ato të lidhura me krizën. Masa është e përkohshme, por mund të zgjatet nëse kriza vazhdon.
Meloni zhvilloi takime me ministrat Giancarlo Giorgetti dhe Gilberto Pichetto, si dhe mori pjesë në një takim me presidentin Sergio Mattarella, ku paralajmëroi ndërhyrjen me dekret urgjent. Fillimisht u shqyrtuan opsione si rikthimi i bonusit të karburantit për kategoritë në nevojë, por u zgjodh një masë e përgjithshme që përfitojnë të gjithë qytetarët.
Opozita kishte kërkuar një masë të tillë që në fillim të luftës, por tani, tre ditë para referendumit, Partia Demokratike e kritikon si vendim me qëllime elektorale.