Kryeministri Edi Rama foli në podcast-in e tij javor për mbështetjen që qeveria do t’u japë bizneseve pas rritjes së pagës minimale nga 40 mijë në 50 mijë lekë. Kjo rritje u zyrtarizua në dhjetor të vitit të kaluar, sipas premtimit të fushatës elektorale.
Qeveria miratoi kompensimin financiar të kontributeve shoqërore dhe shëndetësore për punëdhënësit për periudhën janar-shtator 2026. Shteti merr përsipër të paguajë të gjithë koston e shtuar të sigurimeve për punonjësit. Konkretisht, mbulon 16.7% të kontributeve mbi diferencën e pagës për çdo punonjës që më parë paguhej në fashën 40 mijë deri në 49 999 lekë.
Bizneset nuk do të përballen me kosto shtesë për kontributet, ndërsa punonjësit do të marrin pagë më të lartë. Rama theksoi se kjo masë synon ruajtjen e stabilitetit ekonomik, mbrojtjen e vendeve të punës dhe parandalimin e informalitetit. Ai shtoi se prioritet mbetet punonjësi, ndërsa synohet rritja e mëtejshme e pagës minimale deri në fund të mandatit.