Këshilli i Ministrave ka miratuar planin e ri për administrimin dhe mbrojtjen e Parkut Arkeologjik të Apolonisë. Ministri i Turizmit, Blendi Gonxhja, bëri të ditur se ky vendim shpall parkun "Pasuri Kulturore e Paluajtshme", në përputhje me kërkesat e ligjit nr. 27/2018 për trashëgiminë kulturore.
Sipas vendimit, një nga ndryshimet kryesore është përditësimi i kufijve të parkut, të cilët tani pasqyrojnë koordinatat sipas standardeve të Autoritetit Shtetëror për Informacionin Gjeohapësinor (ASIG). Ky plan organizon parkun në zona me nivele të ndryshme mbrojtjeje, bazuar në potencialin arkeologjik dhe rezultatet e kërkimeve shkencore ndër vite.
Plani i ri përcakton qartë kriteret, procedurat dhe përgjegjësitë institucionale për ruajtjen, konservimin, restaurimin dhe administrimin e parkut. Kjo nismë synon të harmonizojë mbrojtjen e trashëgimisë kulturore me zhvillimin e qëndrueshëm të territorit.
Në bazë të këtij vendimi:
- Autoriteti Shtetëror për Informacionin Gjeohapësinor (ASIG) ngarkohet për publikimin e hartës së re në Gjeoportalin Kombëtar.
- Agjencia Shtetërore e Kadastrës do të kryejë regjistrimin e këtij vendimi sipas legjislacionit në fuqi.
Këto masa forcojnë instrumentet ligjore për mbrojtjen e qendrës së rëndësishme të qytetërimit antik, duke garantuar studimin dhe zhvillimin e Apolonisë si një destinacion kyç i trashëgimisë kulturore dhe turizmit në Shqipëri.