Qeveria miratoi më 29 tetor projektligjin për krijimin dhe funksionimin e Fondit Kombëtar për Artin. Nisma parashikon përdorimin e një pjese të kursimeve të verifikuara nga prokurimet publike për blerjen e veprave të artit dhe koleksioneve me rëndësi historike e kulturore. Projektligji do t’i përcillet Kuvendit për shqyrtim dhe, nëse miratohet, zbatimi parashikohet të nisë në janar të vitit 2027.
Sipas projektligjit, shuma e alokuar për Fondin nuk mund të kalojë 10% të vlerës totale vjetore të kursimeve të verifikuara dhe të certifikuara nga ministria përgjegjëse për financat, të cilat janë të disponueshme për rishpërndarje. Financimi do të miratohet përmes ligjit vjetor të buxhetit. Fondi mund të përfitojë edhe nga donacione, sponsorizime dhe grante të Bashkimit Evropian, organizatave ndërkombëtare dhe partnerëve të kulturës.
Ministri i Turizmit, Kulturës dhe Sportit, Blendi Gonxhja, tha se Fondi synon të krijojë një burim të dedikuar për pasurimin e koleksioneve publike dhe mbështetjen e krijimtarisë artistike. Sipas tij, skema pritet të sigurojë disa milionë euro në vit. Projektligji parashikon që financimi të mbështetet te kursimet e disponueshme, pa krijuar shpenzime të reja buxhetore përtej shumave të alokuara nga këto kursime.
Blerjet do të kryhen përmes një komisioni kolegjial me ekspertë vendas dhe të huaj në artet pamore, historinë e artit, muzeologjinë, trashëgiminë kulturore dhe vlerësimin e tregut të artit. Galeria Kombëtare e Arteve do të ofrojë mbështetje teknike dhe profesionale për vlerësimin, përzgjedhjen, blerjen, administrimin dhe ekspozimin e veprave.
Para blerjes do të verifikohen pronësia dhe prejardhja e objekteve. Projektligji përjashton veprat me autenticitet të dyshimtë, prejardhje të paligjshme ose të përfshira në mosmarrëveshje pronësie. Veprat e blera do të bëhen pronë publike shtetërore dhe do të regjistrohen në inventarin përkatës. Ato synohet të ekspozohen në institucione dhe hapësira publike, për t’u bërë më të arritshme për qytetarët dhe për t’u ruajtur për brezat e ardhshëm.
Vendimet për blerjet duhet të jenë të arsyetuara, të dokumentuara dhe publike. Çdo vit do të publikohet lista e veprave të blera dhe vlerat financiare përkatëse. Përdorimi i fondeve do të kontrollohet përmes mekanizmave të kontrollit të brendshëm financiar dhe auditimit nga Kontrolli i Lartë i Shtetit.