Këshilli i Ministrave ka miratuar në fund të muajit korrik 2026 një vendim të ri, i cili rishikon shpenzimet dhe kompensimin financiar për punonjësit e administratës publike gjatë shërbimeve jashtë vendit. Ky vendim zëvendëson rregulloren e vitit 2011, duke përditësuar kostot pas 15 vitesh.
Sipas rregullave të reja, akomodimi në hotele është ndarë në bazë të funksioneve të zyrtarëve. Presidenti i Republikës, Kryeministri, Kryetari i Kuvendit, Zëvendëskryeministri dhe ministrat do të akomodohen në hotele me pesë yje. Për deputetët, zëvendësministrat, sekretarët e përgjithshëm të ministrive, ambasadorët dhe drejtorët e përgjithshëm, standardi i akomodimit është përcaktuar në hotele me katër yje, ndërsa nëpunësit e tjerë të administratës do të akomodohen në hotele me tri yje. Për nevoja sigurie, efektivët e Gardës së Republikës që shoqërojnë personalitetet shtetërore mund të akomodohen në të njëjtin hotel me personin që ruajnë, pavarësisht kategorisë së hotelit.
Shumat e dietave ditore për udhëtimet janë përcaktuar si më poshtë:
• Presidenti, Kryeministri dhe Kryetari i Kuvendit: 120–150 euro ose dollarë në ditë.
• Zëvendëskryeministri dhe ministrat: 80–120 euro në ditë.
• Deputetët, zëvendësministrat dhe sekretarët e përgjithshëm: 70–80 euro në ditë.
• Drejtorët e përgjithshëm dhe ambasadorët: 50–60 euro në ditë.
• Nëpunësit e tjerë: 45–55 euro në ditë.
Procedurat e pagesës janë ndryshuar për të siguruar më shumë efikasitet. Biletat e udhëtimit dhe akomodimi në hotel do të rezervohen dhe paguhen drejtpërdrejt nga institucioni përkatës. Zyrtarëve do t'u transferohet në llogarinë bankare, përpara nisjes, vetëm shuma e parashikuar për shpenzimet ditore. Shteti mbulon shpenzimet për transportin në aeroport, tarifat rrugore, vizat dhe siguracionin shëndetësor, ndërsa telefonatat, konsumi në minibar dhe transporti urban mbeten detyrim i vetë punonjësit.