Qeveria shqiptare parashikon indeksim të pagave me 2.5% për vitin 2026, në masë të njëjtë me indeksin e ndryshimit të çmimeve të konsumit, për të gjithë punonjësit e administratës publike dhe të pushtetit vendor.
Ministria e Shtetit për Administratën Publike dhe Antikorrupsionin ka përgatitur një projektvendim për ndryshime në Vendimin nr. 328, datë 31.5.2023, të Këshillit të Ministrave. Ky vendim përcakton klasifikimin e funksioneve dhe kufijtë e pagave për funksionarët e zgjedhur e të emëruar, nëpunësit civilë dhe punonjësit administrativë të njësive të vetëqeverisjes vendore.
Indeksimi zbatohet për të gjithë nëpunësit dhe punonjësit në njësitë e vetëqeverisjes vendore, njëjtë si për funksionarët dhe nëpunësit në institucionet e administratës publike. Në vlerë, rritja mujore varion nga 1 000 deri në 10 000 lekë, varësisht nga kategoria dhe pozicioni.
Rritja më e lartë prej 10 000 lekësh parashikohet për punonjësit mbështetës të administratës së pushtetit vendor, duke çuar pagën bazë nga 40 000-47 000 lekë në 50 000-57 000 lekë në muaj.
Për kategorinë e parë, që përfshin funksionarët e zgjedhur të organeve përfaqësuese dhe ekzekutive:
- Kufiri minimal rritet nga 3 925 lekë në 6 700 lekë në muaj;
- Kufiri maksimal, nga 4 625 lekë në 7 969 lekë në muaj.
Për pozicionin "specialist", klasa IV-4, në të gjitha bashkitë dhe këshillat e qarqeve, propozohet rritje prej 1 000 lekësh ose 2 625 lekësh në muaj.