Qeveria shqiptare po shqyrton mundësinë e marrjes përsipër të një pjese të borxheve të kompanisë Air Albania, pas vështirësive financiare dhe ndërprerjes së aktivitetit të saj. Mediat shqiptare i referohen raportimit të medias zvicerane AeroTelegraph për këtë zhvillim.
Sipas këtij raporti, Air Albania ka detyrime të papaguara prej afërsisht 100 milionë eurosh, që përfshijnë pagesat për qiratë e avionëve, tarifat e aeroportit, karburantin dhe shërbimin e ushqimit. Për të shmangur procedurat ligjore, qeveria e kryeministrit Edi Rama ka marrë përsipër rreth 35 milionë euro. Këto fonde do të shlyhen ndaj shtetit në një afat të gjatë dhe synojnë zgjidhjen e pretendimeve nga partnerët ndërkombëtarë të kompanisë.
Air Albania ndërpreu operacionet afërsisht shtatë muaj më parë, pas pezullimit të licencës nga Autoriteti i Aviacionit Civil i Shqipërisë për shkelje kontraktore. Pas këtij vendimi, disa aeroporte ndërprenë shërbimet dhe kontraktorët bllokuan avionët e dhënë me qira. Aktualisht, kompania ndodhet në likuidim.
Në nëntor, Turkish Airlines njoftoi në bursë për shitjen e aksioneve të saj në Air Albania.