Qeveria shqiptare ka miratuar vendimin për vënien në dispozicion të tri pasurive të paluajtshme shtetërore, me një sipërfaqe të përgjithshme prej 90 030 metrash katrorë, në zonën kadastrale 1522 të Bashkisë Durrës. Kjo tokë do t’i kalojë në përdorim shoqërisë “Omnix Albania” sh.p.k. kundrejt tarifës simbolike prej 1 euroje, në kuadër të një investimi strategjik në sektorin e turizmit. Vendimi parashikon gjithashtu miratimin e projektmarrëveshjes përkatëse ndërmjet Ministrisë së Turizmit, Kulturës dhe Sportit dhe subjektit privat.
Sipas të dhënave të regjistrit tregtar, shoqëria “Omnix Albania” është themeluar në vitin 2008 dhe ushtron aktivitet në fushën e zhvillimit të pasurive të paluajtshme, infrastrukturës dhe turizmit. Struktura e pronësisë së kompanisë ndahet ndërmjet katër subjekteve:
• “Klar”, e cila zotëron 50% të kapitalit.
• “Matrix Konstruksion” dhe “Blessed Investment”, të cilat zotërojnë secila nga 17.5% të aksioneve.
• “RDA Petrol”, e cila zotëron 15% të kapitalit.
Sipas raportimeve, shoqëria “Matrix Konstruksion” është në pronësi të Arian Leskajt, ndërsa “Blessed Investment” lidhet me Besnik Leskajn, djemtë e ish-deputetes Valentina Leskaj. Po ashtu, “Klar” rezulton në pronësi të Shkëlqim Beshirit, ndërsa “RDA Petrol” zotërohet nga Fation Veizaj. Për zbatimin e këtij vendimi janë ngarkuar Ministria e Turizmit, Kulturës dhe Sportit, Agjencia Shtetërore e Kadastrës dhe vetë shoqëria “Omnix Albania”. Vendimi hyn në fuqi menjëherë pas botimit në Fletoren Zyrtare.