Karateistët e Kosovës nuk morën pjesë në Kampionatin Evropian të karatesë për kadetë, juniorë dhe grupmoshën U21, të zhvilluar në Limasol të Qipros gjatë fundjavës.
Në garë morën pjesë mbi 1000 garues nga vende të ndryshme evropiane.
Federata e Karatesë së Kosovës mori konfirmim javë më parë se nuk lejohej pjesëmarrja me simbole shtetërore, si flamur apo himn. Qeveria e Qipros, e cila nuk e njeh pavarësinë e Kosovës, vendosi se garuesit kosovarë nuk mund të përdornin simbole që nënkuptonin njohje. Kjo u bë e qartë në letrën e Ministrisë së Punëve të Jashtme të Qipros të datës 16 janar 2026.
Federata Evropiane e Karatesë (EKF) pranoi vendimin dhe ofroi mundësi alternative: pjesëmarrje nën emrin dhe flamurin e federatës kosovare, duke respektuar kufizimet ligjore të Qipros. Federata kosovare refuzoi këtë opsion dhe vendosi të mos udhëtonte. Vendimi u miratua nga bordi ekzekutiv dhe Kuvendi i Punës i federatës.
Komunikimi kishte nisur më 12 janar 2026 nga sekretari i përgjithshëm i Federatës së Karatesë së Kosovës, Nazmi Gashi, drejt sekretarit të EKF-së, Davor Cipek.
Ky nuk është rasti i parë, pasi tre vjet më parë karateistët kosovarë përballeshin me kufizime të ngjashme në një evropian të organizuar në Qipro.