Në Qipro po zhvillohet Kampionati Evropian i Karatesë për kadetë, juniorë dhe U21. Karateistët e Kosovës janë detyruar të garojnë pa simbolet shtetërore të Republikës.
Nazmi Gashi, sekretari i përgjithshëm i Federatës së Karatesë së Kosovës, deklaroi se federata ka dërguar ankesë në institucionet e Federatës Evropiane të Karatesë dhe Federatës së Qipros sapo gara u alokuan në këtë vend.
Ai shpjegoi se në vitin 2023 flamuri i Kosovës nuk u vendos në këto gara, prandaj paraprakisht dërguan ankesë edhe këtë herë. Arsyetimi i organizatorëve ka qenë: “Nuk mundemi me leju sepse Qipro nuk e njeh Kosovën, dhe shteti ka vendosur që ju të garoni me flamurin e Federatës. Normalisht që ne në vitin 2023 nuk kemi marrë pjesë në garë”.
Megjithatë, situata po përsëritet edhe këtë vit, sipas deklaratave të Nazmi Gashit.
Përditësime
Bordi Ekzekutiv i FKK-së vendosi që ekipi kosovar të mos marrë pjesë në kampionatin e karatesë në Qipro, duke respektuar udhëzimin e Ministrisë së Kulturës, Rinisë dhe Sportit.
FKK i dërgoi një letër Federatës së Karatesë të Qipros më 8 tetor 2025. Federata iu përgjigj më 20 janar, duke refuzuar simbolet shtetërore të Kosovës.
FKK planifikon të paraqesë ankesë në kuvendet e ardhshme për të mos dhënë kampionate në vende që nuk e njohin Kosovën.