Qendra Kombëtare e Biznesit (QKB) ka rikujtuar detyrimin ligjor për të gjitha subjektet tregtare që duhet të depozitojnë pasqyrat financiare vjetore për vitin ushtrimor 2025. Afati i fundit për kryerjen e kësaj procedure është data 31 korrik 2026. Ky obligim është i përcaktuar nga ligji nr. 9723, datë 3 maj 2007, "Për Qendrën Kombëtare të Biznesit", i ndryshuar.
Procesi i dorëzimit realizohet ekskluzivisht përmes portalit qeveritar e-Albania, duke përdorur shërbimin "Depozitimi i pasqyrave financiare dhe raporteve të auditimit (për subjektet me administrator shqiptar dhe/ose të huaj)". Dokumentacioni i kërkuar përfshin pasqyrat financiare vjetore, raportin e ecurisë së veprimtarisë dhe raportin e auditimit, kur ato janë të detyrueshme sipas legjislacionit në fuqi.
Sipas QKB-së, detyrimin për këtë raportim e kanë subjektet që janë tatimpagues të Tatimit mbi Fitimin Korporativ ose Tatimit mbi të Ardhurat Personale Biznesore, të cilat gjatë vitit 2025 kanë realizuar një qarkullim vjetor mbi 5 milionë lekë. Institucioni ka kërkuar nga bizneset që të mos e lënë dorëzimin për ditët e fundit, në mënyrë që të shmangen vonesat apo problematikat teknike në sistem.
Subjektet që nuk përmbushin këtë detyrim brenda afatit ligjor do të përballen me masa administrative. Për ndihmë teknike apo informacione shtesë, bizneset mund të kontaktojnë në adresën elektronike asistencaonline@qkb.gov.al ose në numrin pa pagesë 0800 80 02.