Familjarë, të afërm dhe qytetarë të Lezhës u mblodhën të dielën, 10 maj 2026, pranë Obeliskut në qendër të qytetit, dy muaj pas vdekjes së Xhuana Nikollaj. Ata ndezën qirinj, vendosën lule pranë fotos së saj dhe mbajtën një minutë heshtje në nder të 25-vjeçares.
Xhuana Nikollaj humbi jetën pas dhunës së ushtruar nga ish-bashkëshorti Eraldo Fizi, ndërsa dyshohet se më pas ka konsumuar fostoksinë. Eraldo Fizi vijon të jetë në kërkim nga policia.
Të pranishmit shprehën dhimbjen për humbjen e saj dhe zhgënjimin për moszbardhjen e plotë të ngjarjes. Ata kërkojnë nga institucionet përkatëse transparencë në hetim, kapjen sa më të shpejtë të autorit dhe vendosjen e drejtësisë.
Silvana Nikollaj, motra e të ndjerës, deklaroi: "Jemi mbledhur sot këtu me një dhimbje shumë të madhe. U bënë dy muaj nga ikja e Xhuanës dhe akoma nuk është vendosur drejtësi. U bëjmë një lutje të gjithë institucioneve përkatëse, ta zbulojmë të vërtetën dhe të kapet autori. Kjo drejtësi është sensibilizim për të gjitha femrat që mos të dëgjojnë nesër-pasnesër të kenë fatin e Xhuanës."
Marja Nikollaj shtoi: "Drejtësia duhet të vendoset në vend sa më parë, që autori të kapet. Institucionet të bëjnë punën. Të mos e zvarrisin dhe çdo veprim të bëhet në transparencë dhe të dalë e vërteta. Kemi shumë pyetje dhe nuk kemi marrë përgjigje. Përse nuk është kapur akoma autori? Të vazhdojnë kërkimet dhe të mos ndalen që ai të kapet sa më shpejt."
Familjarët theksojnë se prej dy muajsh përballen me plagën e humbjes dhe pritjen e gjatë për drejtësi, ndërsa ngjarja mbetet e mbushur me pikëpyetje.
Përditësime
Xhuana Nikollaj vdiq më 10 mars 2026 në Qendrën Spitalore Nënë Tereza, ku shoqja e saj e gjeti trupin me shenja dhune dhe një letër ku ajo kërkonte falje familjes.
Shoqja dëshmoi për dhunë sistematike ndaj saj.
Ajo u martua në qershor 2025 dhe u nda katër muaj para vdekjes për shkak të konflikteve.
Një kallëzim penal u depozitua një ditë pas ngjarjes në Komisariatin nr. 2 Tiranë.