Pika e Kalimit Kufitar të Kapshticës është përfshirë nga radhë të gjata pritjeje për qytetarët që synojnë të kalojnë drejt Greqisë. Në pikën kufitare të Krystallopigi-t, kolona e automjeteve ka tejkaluar gjatësinë prej 2 kilometrash, ndërsa koha e pritjes për të përfunduar procedurat kufitare ka kaluar 1 orë.
Sipas informacioneve nga terreni, vonesat janë shkaktuar nga një kombinim faktorësh, ku përfshihet puna me sportele të reduktuara nga ana e Policisë Kufitare greke. Gjithashtu, zbatimi i sistemit të ri të kontrollit, i cili kërkon marrjen e shenjave të gishtërinjve dhe fotografimin e fytyrës për çdo udhëtar, ka ngadalësuar ndjeshëm procesin e përpunimit të dokumentacionit.
Kjo situatë është shfaqur që në fillim të vendosjes së sistemit të ri dhe vazhdon të sjellë vështirësi në qarkullimin e lirë mes dy vendeve. Duke pasur parasysh faktin se mbi 21 mijë udhëtarë kanë kaluar kufirin, qytetarët kanë kërkuar shtimin e sporteleve dhe marrjen e masave përshpejtuese nga autoritetet përkatëse. Këto vonesa kanë ngritur shqetësime në prag të sezonit turistik veror, periudhë gjatë së cilës pritet një rritje e mëtejshme e fluksit të lëvizjeve në të gjitha pikat kufitare mes Shqipërisë dhe Greqisë.