Kryeministri Edi Rama mori pjesë në Konferencën e 3-të Kombëtare të Arsimit dhe Formimit Profesional, ku u diskutuan rezultatet e reformës në këtë sektor dhe vizioni "Aftësi 2030". Gjatë fjalës së tij, kreu i qeverisë vlerësoi progresin e bërë në krahasim me sistemin e së kaluarës, duke theksuar se tashmë arsimi profesional është kthyer në një zgjedhje reale për të rinjtë.
Sipas Ramës, ndryshimi është reflektuar edhe në interesin e nxënësve. Nëse në fillim të rrugëtimit të kësaj reforme, përqindja e nxënësve që ndiqnin arsimin profesional ishte pak më shumë se 10%, sot kjo shifër ka arritur në 20%. Pavarësisht kësaj rritjeje, qeveria ka vendosur si synim që ky raport të shkojë drejt objektivit "1 në 3 nxënës" në arsimin profesional.
Kryeministri bëri të ditur gjithashtu se rreth 3500 maturantë të arsimit profesional janë aktualisht në proces provimesh. Ai theksoi se shkollat profesionale sot ofrojnë kushte më të mira infrastrukturore dhe lidhje më të forta me tregun e punës, ndryshe nga mungesa e laboratorëve dhe e kushteve minimale që karakterizonte sistemin në të shkuarën. Reforma, siç u bë e ditur, është bazuar në modele të vendeve që kanë ndërtuar sisteme të admirueshme të arsimit dhe formimit profesional.