Kryetari i Prishtinës, Përparim Rama, ka reaguar ashpër ndaj deklaratës së një anëtareje të kabinetit qeveritar të Serbisë, e cila pohoi se do ta kishte "spastruar etnikisht Kosovën" po të ishte në vendin e Sllobodan Millosheviqit. Në reagimin e tij, Rama vlerësoi se ky artikulim është shprehje e hapur e një ideologjie që nxit dhe mbështet luftërat, gjenocidin dhe krimet kundër njerëzimit.
Sipas kreut të kryeqytetit, kjo deklaratë përbën fyerje për qytetarët e Kosovës dhe është përpjekje për të relativizuar dhe legjitimuar një prej krimeve më të rënda të së drejtës ndërkombëtare. Ai theksoi se është alarmuese që, më shumë se dy dekada pas përfundimit të luftës, një zyrtare e lartë përdor gjuhë të tillë.
"Evropa është ndërtuar mbi parimin e refuzimit të ideologjive të spastrimit etnik. Prandaj, çdo heshtje përballë një deklarate të tillë krijon një precedent të rrezikshëm", deklaroi Rama.
Kryetari i Prishtinës u bëri thirrje Bashkimit Evropian dhe botës demokratike që ta dënojnë pa ekuivok këtë retorikë. Njëkohësisht, ai u kërkoi institucioneve të Republikës së Kosovës që të reagojnë me qartësi, dinjitet dhe vendosmëri:
- Institucionet janë përgjegjëse për të mbrojtur të vërtetën historike dhe kujtesën e viktimave.
- Reagimi institucional ndaj një justifikimi të spastrimit etnik nuk është një zgjedhje politike, por përgjegjësi shtetërore.
- Kosova e njeh çmimin e kësaj gjuhe, të paguar me jetë njerëzish dhe dëbimin e qindra mijëra qytetarëve nga shtëpitë e tyre.
Rama përfundoi duke theksuar se deklarata në fjalë nuk duhet trajtuar si incident kalimtar dhe nuk guxon të kalojë në heshtje.