Kryetari i Bashkimit Demokratik për Integrim (BDI), Ali Ahmeti, reagoi përmes rrjeteve sociale ndaj deklaratës së ministres së Administratës Publike dhe Vetëqeverisjes Lokale në Serbi, Snezhana Paunoviç. Në një intervistë për televizionin Kurir, ministrja serbe u shpreh se, po të ishte në vend të Sllobodan Millosheviçit në vitin 1998, do ta kishte spastruar etnikisht Kosovën.
Ahmeti e cilësoi këtë qëndrim si "tronditës, çnjerëzor dhe të papranueshëm", duke e lidhur atë me mentalitetin e politikave kriminale të ish-regjimit të Millosheviçit. Sipas tij, glorifikimi i politikave gjenocidale është në kundërshtim me vlerat demokratike të shekullit XXI.
Në reagimin e tij, kreu i BDI-së theksoi rolin e Ushtrisë Çlirimtare të Kosovës (UÇK) dhe mbështetjen ndërkombëtare në arritjen e lirisë së vendit. "Ata që edhe sot ëndërrojnë spastrim etnik duhet ta dinë se ideologjitë e urrejtjes gjithmonë përfundojnë në bankën e historisë, ndërsa liria dhe e drejta triumfojnë", u shpreh ai.
Pas kësaj deklarate, autoritetet në Kosovë kanë ndërmarrë masa konkrete duke e shpallur ministren Snezhana Paunoviç person non grata, duke i ndaluar hyrjen në territorin e shtetit. Gjithashtu, Bashkimi Evropian ka reaguar publikisht, duke dënuar retorikën e përdorur nga ministrja serbe si të papranueshme.