Deklarata e ministres së Administratës Publike dhe Vetëqeverisjes Lokale të Serbisë, Snezhana Paunoviq, e bërë më 11 korrik, ka ngjallur reagime të shumta. Ajo pohoi se, po të ishte në vend të ish-presidentit Sllobodan Millosheviq në vitin 1998, do të kishte zbatuar spastrimin etnik në Kosovë.
Pas kritikave, Paunoviq refuzoi të distancohej, duke deklaruar se mbetet besnike ndaj politikave dhe strategjive të Partisë Socialiste të Serbisë (SPS). Psikiatri social Dragan Popadiq vlerësoi se një retorikë e tillë mund të ketë për qëllim mobilizimin e elektoratit të partisë së saj, duke theksuar dëmin që kjo sjell për imazhin ndërkombëtar të Serbisë.
Në rrafshin diplomatik, Komisionerja e Bashkimit Evropian për Zgjerimin, Marta Kos, dhe eurodeputeti Sandro Gozi e kanë dënuar ashpër gjuhën e përdorur. Ndërkohë, presidenti serb Aleksandar Vuçiq është distancuar nga kjo deklaratë, duke u shprehur se fjalët e saj nuk përfaqësojnë qëndrimin zyrtar të qeverisë së Serbisë.
Në Kosovë, autoritetet e kanë shpallur ministren Paunoviq person non grata. Kërkesa për shkarkimin e saj, përveç një pjese të opozitës serbe, është mbështetur edhe nga deputeti i Partisë për Veprim Demokratik, Shaip Kamberi.
Përditësime
Veprimtari nga Bujanoci, Refik Hasani, e vlerësoi deklaratën e ministres Paunoviq si pjesë të një trendi të retorikës raciste të zyrtarëve serbë. Duke e krahasuar me qëndrimet e mëparshme të kryeministres Ana Brnabiq, Hasani argumentoi se këto komente pasqyrojnë një politikë shtetërore që synon pasivizimin e adresave të shqiptarëve në Preshevë, Medvegjë dhe Bujanoc.