Partia Demokratike Evropiane (EDP) ka dënuar ashpër deklaratën e ministres së Administratës Shtetërore dhe Vetëqeverisjes Lokale të Serbisë, Snezhana Paunoviq. Ministrja pohoi se, po të kishte qenë në vend të ish-presidentit serb Sllobodan Millosheviq në vitin 1998, do ta kishte "spastruar etnikisht Kosovën".
Në një reagim të publikuar në rrjetin social X, EDP e cilësoi deklaratën si "skandaloze dhe të papranueshme". Sipas demokratëve evropianë, kjo gjuhë përbën mbështetje të hapur për zhvendosjen me dhunë, persekutimin dhe krimet kundër njerëzimit, duke legjitimuar njëkohësisht politikën për të cilën u akuzua Millosheviqi.
Sekretari i Përgjithshëm i EDP, Sandro Gozi, i bëri thirrje presidentit të Serbisë, Aleksandar Vuçiq, që të distancohet nga këto shprehje dhe të ndërmarrë masa për shkarkimin e menjëhershëm të ministres.
"Presidenti Aleksandar Vuçiq duhet t'i dënojë pa mëdyshje këto deklarata dhe të sigurojë largimin e menjëhershëm të saj nga detyra", deklaroi Gozi.
Në qëndrimin e saj, EDP theksoi se Serbia nuk mund të dëshmojë përkushtim ndaj procesit të anëtarësimit në Bashkimin Evropian për sa kohë anëtarë të qeverisë së saj riaktivizojnë ideologjinë e periudhës së Millosheviqit. Organizata nënvizoi se respektimi i vlerave evropiane kërkon refuzim të plotë të gjuhës që promovon spastrimin etnik, pa asnjë paqartësi apo justifikim.