Eurodeputeti gjerman nga radhët e Partisë Popullore Evropiane (EPP), Michael Gahler, ka reaguar ndaj deklaratës së ministres serbe Snezhana Paunoviq, duke theksuar se qëndrime të tilla nga zyrtarë të një shteti kandidat për në Bashkimin Evropian janë të papranueshme.
Përmes një postimi në platformën "X", Gahler nënvizoi se deklaratat për spastrim etnik nuk mund të injorohen dhe kërkoi shkarkimin e menjëhershëm të ministres nga detyra. Në intervistën e dhënë më 11 korrik, Paunoviq deklaroi se, po të kishte qenë në vend të ish-liderit serb Sllobodan Millosheviq në vitin 1998, ajo do ta kishte "spastruar etnikisht Kosovën nga shqiptarët".
Kësaj thirrjeje i janë bashkuar edhe përfaqësues të politikës gjermane:
• Jasmina Hostert, anëtare e Bundestagut, vlerësoi se justifikimi i spastrimit etnik tall viktimat e luftës dhe dëmton paqen në Ballkanin Perëndimor. Ajo theksoi se deklarata të tilla shkelin të drejtat e njeriut dhe të drejtën ndërkombëtare, duke kërkuar dorëheqjen e ministres.
• Adis Ahmetoviq, deputet i Bundestagut, vlerësoi se përgjigjja e duhur nga autoritetet në Beograd duhet të jetë shkarkimi i ministres. Sipas tij, fryma e nacionalizmit dhe urrejtjes nuk përputhet me bashkësinë e vlerave evropiane dhe dëmton procesin e afrimit të vendeve të rajonit me BE-në.