Kryeministri Edi Rama ka publikuar një reagim në rrjetet sociale lidhur me përhapjen e një videoje, të realizuar përmes Inteligjencës Artificiale (IA), e cila është bërë virale si pjesë e satirës mbi protestat kundër investimit të pritshëm në zonën e Zvërnecit.
Në pamjet e publikuara shfaqen turma flamingosh që, sipas videos, po largohen në drejtim të kufirit me Maqedoninë e Veriut. Sipas kryeministrit, këto pamje janë përdorur për të manipuluar opinionin publik në kuadër të debatit mbi investimet në atë zonë.
Duke iu drejtuar autorëve të videos, Rama shkroi se krijimi i përmbajtjeve të tilla nënvlerëson inteligjencën e qytetarëve. Ai theksoi se projekti në fjalë nuk ka filluar ende, ndaj dhe është e pamundur që lëvizja e shpendëve të ketë ndodhur për këtë shkak.
"Duhet t’i marrësh njerëzit për idiotë që të sajosh të tilla budallallëqe me Inteligjencë Artificiale. Me këto pamje i bie që flamingot po ikin nga sytë këmbët prej zhurmës suaj, jo prej projektit, se projekt s’ka akoma", shprehet kryeministri në reagimin e tij.