Kryeministri Edi Rama ka reaguar përmes rrjeteve sociale në lidhje me kundërshtimet ndaj Paketës së Maleve, nismë e cila po përballet me kritika nga qytetarët që protestojnë kundër ndërtimeve në zona të caktuara. Rama ka ironizuar protestuesit, duke i cilësuar ata si "Flamingot e Bulevardit" dhe duke argumentuar se nisma e tij ndihmon banorët e zonave malore që nuk zotërojnë certifikata pronësie, pasi nuk e kanë pranuar ligjin 7501.
Sipas kreut të qeverisë, pa certifikatë pronësie, banorët e këtyre zonave e kanë të pamundur të marrin leje ndërtimi, të përfitojnë subvencione shtetërore, financime nga Bashkimi Evropian apo kredi bankare. Paketa e Maleve, siç sqaroi Rama, ka për qëllim mbylljen e boshllëkut ligjor dhe nxitjen e investimeve nga emigrantët në tokat e tyre të trashëguara, duke e integruar ekonominë malore në zhvillimin e qëndrueshëm të turizmit.
Duke iu përgjigjur shqetësimeve për mbrojtjen e mjedisit, Rama solli si shembull modelin e Alpeve Austriake. Ai theksoi se në Austri, zhvillimi turistik dhe mbrojtja e natyrës bashkëjetojnë përmes rregullave të qarta dhe investimeve të kontrolluara, duke përmendur rajone si Tirol dhe Kitzbühel. Sipas kryeministrit, zhvillimi në zona të mbrojtura kërkon disiplinë dhe vizion, duke argumentuar se natyra nuk duhet të shihet si pengesë, por si themeli i një ekonomie turistike cilësore.