Kryeministri Edi Rama mirëpriti në Tiranë, më 26 qershor, ish-presidentin e Francës, François Hollande. Në ambientet e Kryeministrisë, gjatë një ceremonie zyrtare, kryeministri shqiptar i akordoi Hollande-it Medaljen e Artë të Mirënjohjes Publike.
Në një reagim në rrjetet sociale, Rama theksoi se ky vlerësim vjen në shenjë mirënjohjeje për miqësinë, mbështetjen dhe kontributin e ish-presidentit në forcimin e marrëdhënieve midis Shqipërisë dhe Francës.
Kryeministri vlerësoi gjithashtu rolin e Hollande-it në promovimin e Shqipërisë në arenën ndërkombëtare, inkurajimin e rrugëtimit evropian të vendit, si dhe besimin e tij për një rol më të rëndësishëm të Shqipërisë në një Evropë të bashkuar.